Brazilian Blowout علاج الكيراتين والبرازيليين بلو اوت للشعر يسبب السرطان

Brazilian Blowout

اليوم راح اتكلم عن علاج الشعر البرازيليين بلو اوت

هذا العلاج من امريكا ونتيجته على الشعر وااااايد حلوه

تعطي الشعر لمعه طبيعيه حيويه ونعومه واايد حلوه

جربته وحده من المقربات لي على شعرها بناء على نصيحه خبيره الشعر بصالون من صالونات الكويت

والنتيجه كانت صج حلوه

بس لاحظت صديقتي اثناء عملية وضع العلاج على الشعر وطريقه تثبيته عن طريق السشوار والستريتنر

تصاعد ابخره وريحه مواد كيميائيه وقام يحرق عيونها وقامت تدمع ولما رجعت البيت حاشتها لوعه مستمره الى الليل

قالت لي اقرأ عنه في الانترنت وارد لها خبر

اول ما دخلت موقع البرازيليين بلو اوت الاساسي الرسمي

دخلت على صفحه العلاج اللي سوته صديقتي شخصيا وقريت عن مكونات واخطار البرازيليين بلو اوت

كاتبين في موقعهم الاساسي ان ماده الفورم الدهيد تنبعث من منتجهم الذي يعتبر مسبب للسرطان

هذا الكلام مو يايبته من عندي هذا كلام الشركه كاتبته عن منتجهم في صفحتهم الرسميه

يعني مو اشاعات هذي حقيقه

اضغطوا على الصوره لتكبر والتحذير حطيت تحته خط احمر

رابط الى هذا الكلام

وقرأت اكثر في مواقع علميه مثل ال

FDA

OSHA

منظمات للصحه والادويه الامريكيه

حذرت من استخدام البرازيليين بلو اوت بشكل كبير لان نسبه الفورمالهيد اللي ينبعث منه تفوق مستويات السلامه المسموح فيها

وفي منتجات اخرى بعد لتنعيم الشعر نسبه الفورمالهيد كبيره وخطره واكثر من المعدل المسموح صحيا وهي

 Brazilian Blowout (Acai Professional Smoothing Solution, Professional Brazilian Blowout Solution),

Brasil Cacau Cadiveu,

Keratin Complex Smoothing Therapy (Natural Keratin Smoothing Treatment, Express Blow Out, Natural Keratin Smoothing Treatment Blonde),

and Marcia Teixeira (Advanced Brazilian Keratin Treatment, Extreme De-Frizzing Treatment).

الشركات ما تكتب على منتجاتها انها تحتوي على الفورمالهيد طبعا لاسباب تسويقيه

ممكن تكتب اسماء اخرى لكن بالنهايه هي نفسها

او مواد اخرى مثل الميثايلين غلايكول يتحول بحراره السشوار والستريتنر الى الفورمالدهيد

وهذي لسته الاسماء اللي لازم تتاكدون عدم وجودها بالمنتج اللي تتحول الى الفورمالدهيد

methylene glycol, formalin, methylene oxide, paraform, formic aldehyde, methanal, oxomethane, oxymethylene, or CAS Number 50-00-0.

 البرازيليين بلو اوت ممنوع في كندا وفي اوروبا

تخيلوا قارتين تقريبا (اعتبر كندا قاره من كبرها) مانعين هذا المنتج انه يدخل عندهم واحنا يدخل الكويت بكل سهوله والكل يروج عنه

من اثار الفورمالهيد حرقان بالعين وكحه وعطس وصعوبه بالتنفس وغثيان ولوعه جبد وحساسيه بالجلد وحكه

 الفورمالدهيد يدخل الجسم عن طريق التنفس وعن طريق ملامسته للجلد او عن طريق العين

 في امريكا حاطين ارشادات ومعايير وضوابط لاستعمال هذا المنتج في الصالونات

ماعتقد بالكويت ملتزمين بهذي القوانين واعتقد مايعرفونها اصلا

ودي هذا الموضوع يوصل للصالونات وتتوعى ان هذا المنتج خطر على الزباين وخطر بنسبة اكبر على الموظفات واللي موجودين بالصالون لان يدخل الفورمالدهيد عن طريق التنفس

المهم اني بريت ذمتي وحطيت عن الموضوع لان عن نفسي ماكنت ادري عن مخاطره ومالقيت احد ينبهني  وقاعده اشوف ناس احبهم يسوونه بدون لا يدرون

والامر بالنهايه راجع لكم هل يسوا اعرض نفسي لامراض انا في غنى عنها؟؟؟

الموضوع كله فيه الادله بالمواقع العلميه وموقعهم الاساسي

هذا الكلام مو مني

هذي لستته المواقع اللي فيها كل المعلومات اللي كتبتها

وداخلهم معلومات زياده انا اختصرتها للي يبي يقرا اكثر

موقع برازيليين بلو اوت الرئيسي

 مصدر معلومه منعه في كندا واوروبا

المصدر الكامل هنا FDA

المصدر الكامل هنا OSHA